📜 శ్రీ రామ భుజంగ ప్రయాత స్తోత్రం
(శ్రీమచ్ఛంకరాచార్య కృతం)
1.
విశుద్ధం పరం సచ్చిదానందరూపం
గుణాధారమాధారహీనం వరేణ్యమ్ ।
మహాంతం విభాంతం గుహాంతం గుణాంతం
సుఖాంతం స్వయం ధామ రామం ప్రపద్యే ॥
2.
శివం నిత్యమేకం విభుం తారకాఖ్యం
సుఖాకారమాకారశూన్యం సుమాన్యమ్ ।
మహేశం కలేశం సురేశం పరేశం
నరేశం నిరీశం మహీశం ప్రపద్యే ॥
3.
యదావర్ణయత్కర్ణమూలేఽంతకాలే
శివో రామ రామేతి రామేతి కాశ్యామ్ ।
తదేకం పరం తారకబ్రహ్మరూపం
భజేఽహం భజేఽహం భజేఽహం భజేఽహమ్ ॥
4.
మహారత్నపీఠే శుభే కల్పమూలే
సుఖాసీనమాదిత్యకోటిప్రకాశమ్ ।
సదా జానకీలక్ష్మణోపేతమేకం
సదా రామచంద్రం భజేఽహం భజేఽహమ్ ॥
5.
క్వణద్రత్నమంజీరపాదారవిందం
లసన్మేఖలాచారుపీతాంబరాఢ్యమ్ ।
మహారత్నహారోల్లసత్కౌస్తుభాంగం
నదచ్చంచరీమంజరీలోలమాలమ్ ॥
6.
లసచ్చంద్రికాస్మేరశోణాధరాభం
సముద్యత్పతంగేందుకోటిప్రకాశమ్ ।
నమద్బ్రహ్మరుద్రాదికోటీరరత్న
స్ఫురత్కాంతినీరాజనారాధితాంఘ్రిమ్ ॥
7.
పురః ప్రాంజలీనాంజనేయాదిభక్తాన్
స్వచిన్ముద్రయా భద్రయా బోధయంతమ్ ।
భజేఽహం భజేఽహం సదా రామచంద్రం
త్వదన్యం న మన్యే న మన్యే న మన్యే ॥
8.
యదా మత్సమీపం కృతాంతః సమేత్య
ప్రచండప్రకోపైర్భటైర్భీషయేన్మామ్ ।
తదావిష్కరోషి త్వదీయం స్వరూపం
సదాపత్ప్రణాశం సకోదండబాణమ్ ॥
9.
నిజే మానసే మందిరే సన్నిధేహి
ప్రసీద ప్రసీద ప్రభో రామచంద్ర ।
ససౌమిత్రిణా కైకయీనందనేన
స్వశక్త్యానుభక్త్యా చ సంసేవ్యమాన ॥
10.
స్వభక్తాగ్రగణ్యైః కపీశైర్మహీశైః
రనీకైరనేకైశ్చ రామ ప్రసీద ।
నమస్తే నమోస్త్వీశ రామ ప్రసీద
ప్రశాధి ప్రకాశం ప్రభో మామ్ ॥
11.
త్వమేవాసి దైవం పరం మే యదేకం
సుచైతన్యమేతత్త్వదన్యం న మన్యే ।
యతోఽభూదమేయం వియద్వాయుతేజో
జలోర్వ్యాదికార్యం చరం చాచరం చ ॥
12.
నమః సచ్చిదానందరూపాయ తస్మై
నమో దేవదేవాయ రామాయ తుభ్యమ్ ।
నమో జానకీజీవితేశాయ తుభ్యం
నమః పుండరీకాయతాక్షాయ తుభ్యం ॥
13.
నమో భక్తియుక్తానురక్తాయ తుభ్యం
నమః పుణ్యపుంజైకలభ్యాయ తుభ్యం ।
నమో వేదవేద్యాయ చాద్యాయ పుంసే
నమః సుందరాయేందిరావల్లభాయ ॥
14.
నమో విశ్వకర్త్రే నమో విశ్వహర్త్రే
నమో విశ్వభోక్త్రే నమో విశ్వమాత్రే ।
నమో విశ్వనేత్రే నమో విశ్వజేత్రే
నమో విశ్వపిత్రే నమో విశ్వమాత్రే ॥
15.
నమస్తే నమస్తే సమస్తప్రపంచ-
ప్రభోగప్రయోగప్రమాణప్రవీణ ।
మదీయం మనస్త్వత్పదద్వంద్వసేవాం
విధాతుం ప్రవృత్తం సుచైతన్యసిద్ధ్యై ॥
16.
శిలాపి త్వదంఘ్రిక్షమాసంగిరేణు
ప్రసాదాద్ధి చైతన్యమాధత్త రామ ।
నరస్త్వత్పదద్వంద్వసేవావిధానాత్
సుచైతన్యమేతీతి కిం చిత్రమత్ర ॥
17.
పవిత్రం చరిత్రం విచిత్రం త్వదీయం
నరా యే స్మరంత్యన్వహం రామచంద్ర ।
భవంతం భవాంతం భరంతం భజంతో
లభంతే కృతాంతం న పశ్యంత్యతోఽంతే ॥
18.
స పుణ్యః స గణ్యః శరణ్యో మమాయం
నరో వేద యో దేవచూడామణిం త్వామ్ ।
సదాకారమేకం చిదానందరూపం
మనోవాగగమ్యం పరం ధామ రామ ॥
19.
ప్రచండప్రతాపప్రభావాభిభూత-
ప్రభూతారివీర ప్రభో రామచంద్ర ।
బలం తే కథం వర్ణ్యతేఽతీవ బాల్యే
యతోఽఖండి చండీశకోదండదండమ్ ॥
20.
దశగ్రీవముగ్రం సపుత్రం సమిత్రం
సరిద్దుర్గమధ్యస్థరక్షోగణేశమ్ ।
భవంతం వినా రామ వీరో నరో వా
సురో వాఽమరో వా జయేత్కస్త్రిలోక్యామ్ ॥
21.
సదా రామ రామేతి రామామృతం తే
సదారామమానందనిష్యందకందమ్ ।
పిబంతం నమంతం సుదంతం హసంతం
హనూమంతమంతర్భజే తం నితాంతమ్ ॥
22.
సదా రామ రామేతి రామామృతం తే
సదారామమానందనిష్యందకందమ్ ।
పిబన్నన్వహం నన్వహం నైవ మృత్యోః
బిభేమి ప్రసాదాదసాదాత్తవైవ ॥
23.
అసీతాసమేతైరకోదండభూషైః
అసౌమిత్రివంద్యైరచండప్రతాపైః ।
అలంకేశకాలైరసుగ్రీవమిత్రైః
అరామాభిధేయైరలం దైవతైర్నః ॥
24.
అవీరాసనస్థైరచిన్ముద్రికాఢ్యైః
అభక్తాంజనేయాదితత్త్వప్రకాశైః ।
అమందారమూలైరమందారమాలైః
అరామాభిధేయైరలం దైవతైర్నః ॥
25.
అసింధుప్రకోపైరవంద్యప్రతాపైః
అబంధుప్రయాణైరమందస్మితాఢ్యైః ।
అదండప్రవాసైరఖండప్రబోధైః
అరామాభిధేయైరలం దైవతైర్నః ॥
26.
హరే రామ సీతాపతే రావణారే
ఖరారే మురారేఽసురారే పరేతి ।
లపంతం నయంతం సదాకాలమేవం
సమాలోకయాలోకయాశేషబంధో ॥
27.
నమస్తే సుమిత్రాసుపుత్రాభివంద్య
నమస్తే సదా కైకయీనందనేడ్య ।
నమస్తే సదా వానరాధీశవంద్య
నమస్తే నమస్తే సదా రామచంద్ర ॥
28.
ప్రసీద ప్రసీద ప్రచండప్రతాప
ప్రసీద ప్రసీద ప్రచండారికాల ।
ప్రసీద ప్రసీద ప్రపన్నానుకంపిన్
ప్రసీద ప్రసీద ప్రభో రామచంద్ర ॥
29.
భుజంగప్రయాతం పరం వేదసారం
ముదా రామచంద్రస్య భక్త్యా చ నిత్యమ్ ।
పఠన్సంతతం చింతయన్స్వాంతరంగే
స ఏవ స్వయం రామచంద్రః స ధన్యః ॥
జై శ్రీరామ్ 🙏
ఇతి శ్రీమచ్ఛంకరాచార్య కృతం శ్రీ రామ భుజంగప్రయాత స్తోత్రమ్
0 Comments